بعتذرلك يا شهيد

دى ثورة تانية مش احتفال
نحتفل ازاى وبأى عين
بدم شهيد على الارض سال
كأننا بنحتفل ببراءة
او حكم باطل
هيتجازى بيه كل محتال
بيقلولك نام وارتاح
زى ما هو نايم
دلوقتى كل سفاح
عن نفسى بقولك لا تنام
ولا يهدالك يا شهيد بال
لو كل واحد على اكتافه
مسئوليتك ودمك شال
حتلاقيهم بيقلولك
لا تهدى ومترتحش
ده حقك علينا
ودمك فى رقابينا
لسه مرجعش
عارف انك فى الجنة قلقان
وعلى حقك خايف
وانا كمان بقولك
خير من اللى بيحصل مش شايف
وبقيت والله العظيم
من النظر ليك خجلان
لكن بقولك كلمة كمان
دمك وحقك
مش هيروح مع النسيان
لو لوحدى حقولها
حقك نعيش تحت رجليك
ونمسح بايدينا
الدموع اللى ملت عينيك
ونلوث بقلوبنا دمك
عشان نحس بظلمك
ونعيش همك وغمك
سنة فاتت على استشهادك
وصوتك لسه محاصرنى
وعذاب ضميرى واجعنى
لسه محققناش ولا شئ
من اللى راحت
عشانه حياتك
نورك يا شهيد بينطفى
وخايف على حقك
اللى شوية شوية بيختفى
بعتذرلك يا شهيد
وسامحينى يا ام الشهيد
كنت السنة دى اضعف
وعجزت انى اداوى جرحك
ووقفت ساكت
ومدافعتش حتى عنك
لما حاولوا يشهوا صورتك
لكن من دلوقتى بقولك
هنوريك يوم فى اللى قتلوك
يوم اسود عليهم
هنوريك الحسرة فى عينيهم
هنوريك السواد فى وشوشهم
عشان من حضن امك خدوك
واما انى اغلى تمنك
وتدمع عينيهم دم
ويفتكروا بكل الخير دمك
وانى ارجعلك حقك
او انك تلاقينى جنبك
لا ههدى ولا هرتاح
الا لما تكون فى الجنة
منورة صورتك
ونقدر نرفع لفوق راسنا
ونقدر ساعتها نقولك
فى جنة الخلد يا شهيد
فى جنة الخلد يا بطلنا

تسلم الايادى

وجزاك الله كل خير اخى الفاضل

شكرا جزيلا وان شاء الله الموضوع يكون عجبك

اكيد عجبنى